Компјутерски модел за прецизна анализа на електромагнетни појави во енергетски системи

Abstract

Прецизното моделирање на електромагнетни појави во енергетските системи е од голема важност поради: 1) обезбедување заштита на енергетските системи и луѓето во нивната околина, 2) оптимален дизајн на мерките за заштита од електромагнетни влијанија. Во инженерските анализи вообичаена е примената на компјутерски модели кои поради усвоените упростувања најчесто имаат ограничен домен на примена во нискофреквентни анализи, анализи на системи во присуство на хомогена земја или системи со мали димензии. Треба да се истакне дека честа е употребата на овие модели во практични анализи и надвор од нивниот домен на примена, што може да резултира со погрешна проценка на безбедносните ризици или несоодветно димензионирање на заштитата. Во овој труд ќе биде претставен компјутерски модел за анализа на електромагнетни појави во енергетски системи кој се базира на примена на егзактна електромагнетна теорија, а кој обезбедува резултати со висока точност кај надземни и подземни сложени системи во присуство на слоевита земја во фреквенциски опсег од 0 Hz до 100 MHz. Моделот има широк домен на примена во инженерски анализи, a неговите можности ќе бидат демонстрирани преку неколку карактеристични примери: 1) моделирање на заштитно заземјување, проценка на напони на чекор и допир и преоден потенцијал при удар на гром кај трафостаница, 2) анализа на голем заземјувач кај фотоволтаична централа со инсталирана моќност од 60 МW, 3) моделирање на електрично и магнетно поле во околина на далеководи од аспект на проценка на безбедност на луѓе и опрема од електромагнетни влијанија, 4) анализа на електромагнетни влијанија врз цевководни системи, кои се предизвикани од блиски енергетски водови и заземјувачки системи. Во трудот ќе бидат дискутирани и техничко-економските придобивки од примената на овој модел.