„Автобиографијата“ на Григор Прличев како жанровска парадигма во македонската литература од XIX век

Abstract

Истражувањето на жанровските карактеристики на автобиографијата претставува мошне важна задача во книжевнотеориска смисла, бидејќи автобиографијата како жанр повлекува редица прашања кои се однесуваат на валидноста на теориската претпоставка за постоењето на жанровите воопшто. Автобиографијата, како жанр кој најчесто се исклучувал од централистичката концепција на жанровите поради својата хибридна структура (односно поради јасното и недвосмислено упатување на референцијалната стварност на текстот), ги отвора прашањата за суштината на фикционалноста, како и за авторството, вистината и себството. Определувањето на автобиографскиот потфат на Прличев како парадигматски се раководи од фактот што неговото дело, во најголема мера, ги рефлектира специфичностите на жанрот автобиографија.