ЧАЛГИСКАТА МУЗИЧКА ТРАДИЦИЈА ВО МАКЕДОНИЈА НИЗ ПРИМЕРОТ НА ОХРИДСКАТА ЧАЛГИЈА

Abstract

Чалгиската музичка традиција претставува еден од најуникатните сегменти од Македонскиот музички фолклор првенствено поради своето потекло и начин на инкорпорирање во музичката култура, а од друга страна и поради својата испреплетеност на музички влијанија од поблиските и подалечните источни и западни култури, но и поради репертоарот во кој се содржани разновидни музички примери. Во тој контекст, чалгиската музика во Македонија е претставник на урбаната музичка култура во најголема мера во периодот од втората половина на 19век и првата половина на 20век. Таа била распространета во најголем број градови во Македонија, но чалгиската музичка традиција од градот Охрид како една од најрепрезентативните и најпрочуените претставува доминантен преставник на македонската чалгиска традиција воопшто. Во овој труд ќе се обидам да го детерминирам местото и улогата на Охридската чалгиска музичка традиција, нејзините најистакнати претставници- изведувачи, како и нејзиниот карактеристичен репертоар.