Пристојна Работа и Правна Положба на Куќните Помошници

Abstract

Концептот „пристојна работа” и неговото регулирање, започнуваат да се појавуваат како основни подрачја кон кои е насочена нормативната активност на Меѓународната организација на трудот (МОТ). Пристојната работа се сведува на четири основни компоненти кои се нераздвојлив дел од секој работен однос: примена на загарантираните права од работен однос, создавање услови и можности за вработување, соодветна социјална заштита и социјален дијалог. Tрадицијата, природата на работата и правната положба на куќните помошници, ја карактеризираaт оваа група работници како една од најранливите категории. МОТ, со усвојувањето на Конвенцијата за куќни помошници, 2011 (бр. 189) и Препораката за куќни помошници, 2011 (бр. 201), воспоставува нова димензија во регулирањето на условите за работа на куќните помошници. Работните односи на куќните помошници се почесто се нормираат и од страна на националните работни законодавства. Пристојната работа на куќните помошници, произлегува од начинот на регулирање и имплементација на пристојните услови за работа на оваа категорија работници. Во рамките на условите за работа, пристојната работа на куќните помошници се поврзува со пристојно плаќање и регулирано работно време.