Социо-економски фактори и нивното влијание во современото семејство

Abstract

Докторската теза е изработена на Институтот за социјална работа и социјална политика - Скопје, во овој труд е направено анализа врз база на добиените податоци од 200 испитаници од градот Скопје селектирани по случаен избор. Добиените резултати овозможија да се согледаат состојбите и промените во современото македонско семејство под влијание на социјалните и економските фактори. Трудот има за цел да се увидат предностите и слабостите кои постојат во современото македонско семејство, како и да се дадат конкретни предлози и сугестии за тоа како предностите кои постојат во современото семејство да се задржат и надградат, а како слабостите да се коригираат или одстранат. Во истражувањето се обработуваат состојбите и промените кои настануваат во современото македонско семејство под влијание на социо-економските фактори. Факторите кои влијаат врз социо-економскиот статус на семејството ја објаснуваат социјалната и економската позадина на родителскиот дом и нејзиното влијание врз иднината на младите лица. Мотивот за изработка на тезата произлегува од потребата да се прикажат актуелностите, спецификите и промените кои настануваат во современото семејство. За оваа цел се увиде функционалноста на семејната политика како во Република Северна Македонија, така и во развиените европски земји. Основна цел на овој труд е да се прикажат состојбите, потребите и промените кои настануваат во современото семејство под влијание на социо-економските фактори. Практична цел на ова истражување е да се подигне нивото на свест и информираност кај граѓаните за реалната слика на состојбите и промените кои настануваат во современото македонско семејство, како и во земјите кои се поразвиени, со цел предизвикување на позитивни промени како врз поединецот, така и врз целокупната економија и пазарот на труд. Со ова едновремено се укажа и на постоечкото знаење и познавање на овој процес, како и на интервенциите на економско социјалните институции како во Република Северна Македонија, така и во развиените земји.