ПРИСТАП ЗА АНАЛИЗА НА РИЗИЦИ КАЈ ЖЕЛЕЗНИЧКИ ТУНЕЛИ

Abstract

Интензивната потреба и изградба на тунелите е проследена со несигурности. Причина за појава на несигурности се комплексните решенија и услови за овие конструкции. Местоположбата и димензиите, стануваат се повеќе предизвикувачки, а изградбата се предвидува во посложени геолошки услови, што доведува до примена на нови пристапи, методологии и технологии од страна на инженерите. Еден од поновите пристапи за справување со несигурностите е процената на хазарди и ризици и дефинирање на начини за нивно управување. Процената на ризиците е есенцијален дел за донесување на правилни одлуки. Многу често решенијата кои изгледаат поевтини и побрзи базирано на детерминистички проценки, се поврзани со поголеми несигурности и ризици. Кај тунелите може да се јават знајачни ризици поврзани со пречекорување на трошоците, одложување на рокот на изведба и последици врз животната средина. Исто така, како што е демонстрирано во повеќе историски записи, во тунелите има голем потенцијал за несреќи врз лица во процесот на изградба. Генерално има два пристапи за процена на ризиците: квалитативен и квантитативен. Во овој труд е прикажан пристап за процена на ризици кој претставува комбинација од анализа на дрвото на грешки и анализа на дрвото на настани, со што се добива квантитативен резултат кој понатаму може да се примени за рангирање во однос на граници на прифатливост и определување на соодветни превентивни или заштитни мерки.