ПРАВНА ЗАШТИТА НА КОРИСНИЦИТЕ НА ЈАВНИ УСЛУГИ СОГЛАСНО ЗАКОНОТ ЗА ОПШТАТА УПРАВНА ПОСТАПКА

Abstract

Предметот на истражување во овој труд е новината во Законот за општа управна постапка која се однесува на правната заштита на корисниците на јавните услуги. Конкретно, анализа на прашањата кои се однесуваат на странките во постапката, односно кои се корисници, а кои даватели на услуги, правата и обврските на давателите на јавните услуги и приговорот како ново редовно правно средство што може да го поднесат корисниците на услугите доколку не се задоволни од квалитетот на добиената услуга. Оваа новина е предвидена со ЗОУП од август 2015 година кој започна да се применува во јули 2016 година. По едногодишна примена на ова законско решение во трудот ќе се обидеме да дадеме одговор на прашањата кои се однесуваат на усогласувањето на материјалните прописи со ЗОУП, како и постапката за остварување на оваа правна заштита. Имено, авторите преку позитивно правна анализа на законските решенија со кои се уредува оваа проблематика ќе укажат на новите права и обврски кои ги имаат физичките и правните лица при остварување на правото на користење на јавни услуги, но и правата и обврските на јавните органи при давањето на јавни услуги.