АСОЦИРАНОСТ НА СЕРУМСКИОТ ЛИПИДЕН СТАТУС СО НАЧИНОТ НА АПЛИКАЦИЈА НА ХЕРОИНОТ КАЈ ОПИЈАТНА ЗАВИСНОСТ

Abstract

Хроничната злоупотреба на хероин е асоцирана со нарушувања во серумскиот липиден профил на зависниците и почеста појава на напредната артериосклероза кај опиоидни зависници што е презентирано во постмортем студии. Поновите студии упатуваат на веројатно дополнително влијание на начинот на употреба на дрогата врз појава на дислипидемијата. Целта на студијата беше да го евалуира влијанието на инхалаторниот наспроти интравенскиот начин на апликација на хероинот врз липидниот статус на хероинските зависници. Студијата е прсечна и проспективна, вклучува 40 испитаници, хероински зависници, поделени во 2 групи според начинот на употреба на дрогата (инхалаторно и интравенски). Групите се хомологни според возраст, пол, БМИ, Бринкман-ов индекс, но со подолготраен период на злоупотреба на дрогата кај интравенските корисници ( група2). Зависниците со интравенски начин на консумација имаат статистички значајно пониски вредности на HDL-C ( 0,99 ± 0,33 mmol/l vs. 1,17 ± 0,27 mmol/l) и apoA-I (1,13 ± 0,19 g/l vs. 1,38 ± 0,24 g/l) во однос на инхалаторните корисници и контролната група на здрави испитаници ( 1,40 ± 0,30 mmol/l за HDL-C и 1,40 ± 0,37 g/l за apoA-I). Снижени вредности за apoB (0,65 ± 0,17 g/l ver. 0,70 ± 0,28 g/l) има кај двете групи хероински зависници во однос на контролната група. Групата интравенски зависници со значајно намалени концентрации на HDL-C и apoA-I e со статистички сигнификантно подолготрајна злоупотреба на дрогата во однос на инхалаторните корисници ( 6,50 ± 3,9 год vs. 4,41 ± 3,1 год, p<0,5). Заклучок: хроничната злоупотреба на хероин по пат на интравенска консумација е поврзана со значајна редукција на серумските нивоа на HDL-C и apoA-I нивоата во однос на инхалаторниот внес. Времетраењето на зависноста го потенцира снижувањето на нивоата на антиатерогените липидни фракции во прилог на кумулативен ефект на експозицијата на опијати врз метаболичките нарушувања.