Лексиката во преводите од англиски на македонски јазик на научна и стручна литература од економско-финансиската област

Abstract

Јазикот претставува општествена појава поради непосредната врска со сите области од човековата дејност. Развитокот и промените во општеството влијаат и врз промени во јазикот, а особено врз лексиката, што ја прави особено интересна за истражување. Истражувањето во дисертацијата е тесно фокусирано на еден недоволно истражен дел од лексиката, а тоа е стручната лексика од економско-финансиската област. Лексичкото рамниште е најмногу изложено на промени бидејќи општествените промени се одразуваат и во лексиката. Целта на трудот е да се анализираат различните фази во развојот на лексичкиот фонд во македонскиот јазик од економско-финансиската област и од какви видови лексика е составен. Анализата на стручната лексика и техниките за нејзино преведување се заснова на современ корпус со голема практична вредност и широка примена, достапен за широка читателска публика во глобални рамки, а во преведено издание и за македонската јавност. Во заклучоците се понудени преведувачки техники што можат да најдат соодветна примена во преведувачката практика во земјава.