Пролегомена за класификацијата на прозните жанрови во македонската литература од 19 век

Abstract

Македонската литература од 19 век, според нејзините својства и специфичен тек, претставува еден од најпроблематичните периоди во развојот на македонската култура воопшто. Досега, нејзините карактеристики се проследуваа преку најразлични, главно позитивистички насочени анализи, кои ја опишуваат појавата на книжевниот артефакт во дијахрониска смисла. Целта на овој текст е да ја преосмисли таквата поставеност на македонската литература од овој период, но во функција на една поразвиена жанровска типологија на прозните жанрови, соодветно на аналитичките премиси на Ханс Роберт Јаус. Сметаме дека таквата класификација ја дополнува историската перспектива низ која се проучува 19-вековната литература, што овозможува и збогатување на синхрониските истражувања на соодветните појави. Постоењето на валидна жанровска класификација создава можност да се одговори прашањето за жанровите кои се појавуваат, навидум, без жанровски претходник, како и соодветно да се промисли проблемот на жанровскиот развој и т.н. еволуција на жанрот.