„Информираната“ согласност во системот на правата на пациентите (од Нирнберг до Овиедо)

Abstract

Иако специфичниот однос лекар - пациент од многу одамна е предмет на научен интерес, доминацијата на релативно новиот концепт на автономија ги подигна стандардите за правата на пациентите кои станаа и законски регулирана материја, a воедно и одговорност не само на здравствените работници туку и на здравствените установи воопшто. Во системот на здравствени права, посебно место зазема, т.н. информирана согласност, што воедно е прогласена за „златен стандард“ на медицинските интервенции, од причина што претставува еманација на концептот на автономија според кој самиот пациент одлучува за својот третман по соодветно информирање за неговата здравствена состојба, можните опции за лекување и други релевантни околности, очекувани ризици и придобивки од секој од можните третмани итн. „Информираната“ согласност претставува процес во кој првенствено на пациентот (илина субјектот на биомедицинско истражување) му се предочуваат сите горенаведени аспекти, а потоа се обезбедува согласност на начин и во форма како што тоа го предвидува законот. Иако едно од фундаменталните, ова право често е повредено заради несоодветно спроведување на процесот на информирање на пациентот.