Осовременување на методите и техниките во наставата по стручен јазик и терминологија на интердисциплинарни студии по преведување и толкување

Abstract

Истражувачкиот проект „Осовременување на методите и техниките во наставата по стручен јазик и терминологија на интердисциплинарни студии по преведување и толкување“ се спроведуваше на Катедрата за преведување и толкување при Филолошкиот факултет „Блаже Конески“ во Скопје во периодот 2020 – 2021 година. Проектот е во доменот на наставната методологија за преведување и толкување и беше финансиран од страна на Универзитетот „Св. Кирил и Методиј“ - Скопје. Членовите на проектниот тим беа наставници на терминолошки предмети по англиски јазик на горенаведената катедра, при што фокусот на проектот беше ставен на две клучни компетенции за студентите по преведување и толкување и тоа терминолошката (под)компетенција и дигиталната компетенција во согласност со Европската рамка за компетенции од 2017 година. Оттука, проектот се состоеше од две различни компоненти со цел да се опфатат и двете суштински компетенции за студентите во согласност со релевантни европски референтни документи и меѓународни стандарди. Целта на овој труд е да ги претстави главната цел, поединечните цели и главните активности на проектот, како и да ги презентира главните резултати од проектот, вклучувајќи ги и постигнатите резултати и објавени публикации со цел нивна дисеминација и натамошна примена во високото образование.